PATRIARCATO  DI  MOSCA

PARROCCHIA  ORTODOSSA

“SAN  GIOVANNI  DI  KRONSTADT”

 CASTROVILLARI

Domenica 23 febbraio 2020

Tono III – Carnevale

Domenica del Giudizio Universale

Memoria di San Caralampo

Tropari :

Да веселятся небесная, да радуются земная, яко сотвори державу мышцею Своею Господь, попра смертию смерть, первенец мертвых бысть; из чрева адова избави нас, и подаде мирови велию милость.

Страстоте́рпцу Харала́мпию присту́пим/ и о́бразу его́ поклони́мся, от се́рдца вопию́ще:/ му́чениче Харала́мпие и о́тче,/ от вся́каго обстоя́ния и всех бед свои́х раб изба́ви нас,// в це́ркве твоея́ вы́ну пребыва́ющих.

Егда приидеши, Боже, на землю со славою,/ и трепещут всяческая,/ река же огненная пред судищем влечет,/ книги разгибаются, и тайная являются:/ тогда избави мя от огня неугасимаго// и сподоби мя одесную Тебе стати, Судие Праведнейший.

Слава Отцу, и Сыну, и Святому Духу.

Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче, граду Кронштадту похвало и Церкве нашея украшение, моли Всеблагаго Бога умирити мир и спасти души наша.

И ныне и присно и во веки веков. Аминь.

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно, Богородице, чтущих Тя.